ភ្នំពេញ៖ ក្រសួងធនធានទឹក និងឧតុនិយម បានប្រាប់ឱ្យដឹងថា រដូវវស្សាឆ្នាំ២០២៣នេះ នឹងចូលមកដល់នៅសប្តាហ៍ទី២នៃខែឧសភា ហើយនឹងបញ្ចប់នៅក្នុងសប្តាហ៍ទី១នៃខែវិច្ឆិកា។ រដូវវស្សាឆ្នាំនេះ ចូលមកដល់ជាងយឺតឆ្នាំ២០២២។ នៅរដូវវស្សាឆ្នាំនេះមានបរិមាណទឹកភ្លៀងពីតិចទៅមធ្យម ដែលតិចជាងឆ្នាំមុន។

ក្រសួងធនធានទឹកបានបញ្ជាក់ថា នៅក្នុងដើមរដូវវស្សានេះ អាចមានការកើតឡើងជាញឹកញាប់ជាយថាហេតុនូវបាតុភូតផ្គរ រន្ទះ ខ្យល់កន្ត្រាក់ និងខ្យល់គួច (Gust wind និង Squall)។

នៅពាក់កណ្តាលរដូវវស្សា ចាប់ពីខែសីហា ដល់ខែកញ្ញា នឹងអាចមានភ្លៀងធ្លាក់នៅក្នុងបរិមាណពីតិចទៅមធ្យម និងផ្នែកខ្លះជាបង្គួរ ជាមួយនឹងមានបាតុភូតផ្គរ រន្ទះ និងខ្យល់កន្ត្រាក់ជាបង្គួរផងដែរ។

នៅចុងរដូវវស្សា អាចនឹងបញ្ចប់នៅក្នុងសប្ដាហ៍ទី១ នៃខែវិច្ឆិកា ជាមួយនឹងបរិមាណទឹកភ្លៀង ក្នុងកម្រិតពីខ្សោយទៅមធ្យម និងកន្លែងខ្លះអាចមិនទទួលបានភ្លៀងឡើយ។ នៅចុងរដូវវស្សា នេះក៏អាចមានបាតុភូតផ្គរ រន្ទះ ខ្យល់កន្ត្រាក់ និងខ្យល់គួច (Gust wind និង Squall) ក្នុងកម្រិតជាមធ្យមផងដែរ ពិសេសនៅតំបន់មាត់សមុទ្រ និងតំបន់ជាប់ទន្លេ។

តាមការបញ្ជាក់ពីក្រសួងធនធានទឹក នៅក្នុងរដូវវស្សាឆ្នាំនេះ ចំនួនព្យុះអាចនឹងកើតឡើងក្នុងរង្វង់ពី ២៤-២៦ ព្យុះ នៅក្នុងមហាសមុទ្រប៉ាស៊ីហ្វិក នឹងអាចមានព្យុះខ្លះ កើតឡើងផ្ទាល់នៅក្នុងសមុទ្រចិនខាងត្បូង។

នៅក្នុងរដូវវស្សាឆ្នាំ២០២៣ កម្ពុជាមានកូនរដូវប្រាំង ដែលអាចកើតឡើងដែលអូសបន្លាយចាប់ពីដើមខែកក្កដា រហូតដល់ដើមខែសីហា។

បើតាមក្រសួងធនធានទឹក កម្ពុជាចាប់ពីខែឧសភា រហូតដល់ខែសីហា ឆ្នាំ២០២៣ នឹងទទួលរងនូវឥទ្ធិពលពីបាតុភូតអែលនីណូ (El Nino) ក្ដៅមាន ៦០ភាគរយ និងបាតុភូត អែនសូ (Neutral) មាន ៤០ភាគរយ ដែលជាបាតុភូតអន្តរកាលចន្លោះរវាងបាតុភូតអែលនីណូ (El Nino) និងឡានីណា (La Nina)។ ចាប់ពីខែកញ្ញាដល់ខែវិច្ឆិកា បាតុភូតអែលនីណូ (El Nino) អាចនឹងកើនឡើងដល់ ៧០ភាគរយ ទៅ៨០ភាគរយ និងបាតុភូត (Neutral) ថយមកនៅ ២០ភាគរយ ទៅ៣០ភាគរយ៕